तवा येथे नवतरुण मित्र मंडळाचा भव्य सांस्कृतिक सोहळा

तवा येथे नवतरुण मित्र मंडळाचा भव्य सांस्कृतिक सोहळा

विविध स्पर्धा, बक्षिसे आणि मान्यवरांच्या उपस्थितीत सोहळा अविस्मरणीय

डहाणू : भरत पुंजारा (दि.०६ सप्टेंबर)

गणेशोत्सव म्हणजे श्रद्धा, परंपरा आणि सांस्कृतिक उत्साहाचा संगम. तवा येथे यंदा गणेशोत्सवाच्या पार्श्वभूमीवर नवतरुण मित्र मंडळातर्फे आयोजित भव्य सांस्कृतिक कार्यक्रमाने गावाला नेत्रदीपक रंगत आणली. अकरा दिवसीय उत्सवात नृत्य, नाट्य, गीते अशा विविध सादरीकरणांच्या माध्यमातून स्थानिक कलाकारांना आपली कला सादर करण्याची संधी मिळाली. लहान मुलांपासून युवक आणि ज्येष्ठ नागरिकांपर्यंत सर्व वयोगटातील कलाकारांनी उत्स्फूर्त सहभाग नोंदवल्याने हा कार्यक्रम खऱ्या अर्थाने सर्वसमावेशक ठरला.

यंदा नवतरुण मित्र मंडळाचे ६४ वे वर्ष पूर्ण होत आहे. सामाजिक, सांस्कृतिक तसेच जनजागृतीपर उपक्रमांतून मंडळाने गावात वेगळे स्थान निर्माण केले आहे. त्यामुळेच गणेशोत्सवाच्या निमित्ताने आयोजित या कार्यक्रमाला ग्रामस्थांचा प्रचंड उत्साह लाभला. स्थानिक कलागुणांना व्यासपीठ देणे आणि गावातील सांस्कृतिक वातावरण वृद्धिंगत करणे हा या उपक्रमाचा उद्देश असल्याने ग्रामस्थांनीही मोठ्या संख्येने हजेरी लावली आणि वातावरण अधिक उत्साहपूर्ण केले. या सोहळ्याला गावचे पोलिस पाटील चिंतामण नम, ग्रामपंचायत सदस्य, प्रतिष्ठित व्यक्ती प्रदीप नम, समाजसेवक मुकुंद नम, पत्रकार भरत पुंजारा, कुणाल पासारे, वैभव पासारे, जितेश तुंबडा, करण केदार, मयुर पासारे, माहादु नम, तुषार पासारे, प्रतिक धांगडा, सचिन झाटे, प्रल्हाद यांसह मंडळाचे अध्यक्ष, उपाध्यक्ष, सचिव, सदस्य आणि गावातील मान्यवर उपस्थित होते.

या कार्यक्रमादरम्यान घेण्यात आलेल्या विविध स्पर्धांमध्ये विजयी ठरलेल्या प्रथम, द्वितीय आणि तृतीय क्रमांकाच्या स्पर्धकांना मंडळाच्या वतीने बक्षिसे देऊन गौरविण्यात आले. कार्यक्रमाचे सूत्रसंचालन आणि आभारप्रदर्शन सुभाष केदार यांनी केले. या सांस्कृतिक सोहळ्याच्या यशस्वी आयोजनासाठी मंडळाच्या सर्व सदस्यांनी परिश्रम घेतले. गावकऱ्यांचा उत्स्फूर्त प्रतिसाद आणि कलाकारांचा उत्कट सहभाग यामुळे यंदाचा गणेशोत्सवातील हा सांस्कृतिक कार्यक्रम गावाच्या स्मरणात दीर्घकाळ राहणारा अविस्मरणीय सोहळा ठरला.