धुंदलवाडी ग्रामपंचायतीत मुख्यमंत्री समृद्ध पंचायतराज अभियान कार्यशाळा व महाआवास पुरस्कार सोहळा उत्साहात संपन्न
डहाणू : शैलेश तांबडा
धुंदलवाडी (ता. डहाणू, जि. पालघर) येथे दिनांक १७ सप्टेंबर २०२५ रोजी मुख्यमंत्री समृद्ध पंचायतराज अभियानांतर्गत ग्रामस्तरीय कार्यशाळा तसेच महाआवास अभियान २०२३–२४ व २०२४–२५ या वर्षांसाठी तालुका स्तरीय पुरस्कार वितरण सोहळा मोठ्या उत्साहात पार पडला.
या कार्यक्रमाचे उद्घाटन जिल्हा ग्रामीण विकास यंत्रणा, पालघर प्रकल्प संचालक डॉ. रुपाली सातपुते आणि पंचायत समिती डहाणू गटविकास अधिकारी (उ.श्रे.) पल्लवी सस्ते यांच्या हस्ते करण्यात आले. कार्यक्रमाचे अध्यक्षस्थान ग्रामपंचायत धुंदलवाडी सरपंच प्रभावती सोनू महाला यांनी भूषविले तर कार्यक्रमाला उपसरपंच, शासकीय अधिकारी, कर्मचारी तसेच ग्रामस्थ मोठ्या संख्येने उपस्थित होते. यानिमित्ताने आयोजित विशेष ग्रामसभेत सुमारे २०० ग्रामस्थांनी सक्रीय सहभाग नोंदवला. ग्रामसभेत ग्रामपंचायतीच्या विकास आराखड्याबरोबरच समृद्ध पंचायतराज अभियानाची उद्दिष्टे व विविध योजनांची माहिती देण्यात आली.
यावेळी ग्रामपंचायतीने अभियानात सक्रिय सहभाग घेऊन चांगली कामगिरी करण्याचा ठराव एकमुखाने मंजूर करण्यात आला. या उपक्रमामुळे ग्रामस्थांमध्ये विकास योजनांविषयी जागरूकता निर्माण झाली असून, गावाच्या सर्वांगीण प्रगतीसाठी ग्रामपंचायत व ग्रामस्थांनी एकत्रितपणे कार्य करण्याचा निर्धार व्यक्त केला.
Post a Comment
0 Comments