पालघर पोलिसांची धडक कारवाई; सुगंधीत तंबाखूसह ३२ लाखांचा मुद्देमाल जप्त

पालघर पोलिसांची धडक कारवाई; सुगंधीत तंबाखूसह ३२ लाखांचा मुद्देमाल जप्त

तलासरी : अशरफ खान

पालघर पोलिसांनी गणेश उत्सवाच्या पार्श्वभूमीवर अवैध धंद्यांवर नियंत्रण ठेवण्यासाठी सुरू केलेल्या कारवाईत मोठे यश मिळवले आहे. स्थानिक गुन्हे शाखा, पालघर आणि तलासरी पोलीस ठाण्याच्या संयुक्त पथकाने तलासरी ईभाडपाडा येथील सुत्रकार ओव्हरब्रिजजवळ मुंबई-अहमदाबाद महामार्गावर धडक कारवाई करत तब्बल ३२ लाख ९६ हजार ५०० रुपयांचा मुद्देमाल जप्त केला असून या प्रकरणी दोन आरोपींना अटक करण्यात आली आहे.

मिळालेल्या माहितीनुसार, बुधवार दि. ०३ सप्टेंबर रोजी स्थानिक गुन्हे शाखेला गोपनीय माहिती मिळाली होती, लाल रंगाचा आयसर कंपनीचा टेम्पो (क्रमांक MH10-DT-6633) यामधून गुटख्याची अवैध वाहतूक होणार आहे. या माहितीनुसार पथकाने तलासरी पोलीस ठाण्याच्या मदतीने महामार्गावर नाकाबंदी केली. काही वेळाने संशयित टेम्पो तिथे येऊन थांबल्यानंतर त्याची तपासणी करण्यात आली असता चालक बाळू किसन गंगावणे (वय ५०, रा.सांगली) व त्याचा साथीदार राजू संजय कांबळे (वय २७, रा.सांगली) यांनी सुरुवातीला टेम्पोमध्ये फ्रोझन फूड कंपनीचा माल असल्याचे सांगितले. मात्र, त्यांच्या हालचाली संशयास्पद वाटल्याने टेम्पोची कसून तपासणी करण्यात आली असता त्यात महाराष्ट्र राज्यात बंदी असलेला तब्बल २० लाख ९६ हजार ५५० रुपयांचा सुगंधीत तंबाखू आढळून आला. या टेम्पोसह एकूण ३२ लाख ९६ हजार ५०० रुपयांचा मुद्देमाल पोलिसांनी ताब्यात घेतला आहे. या प्रकरणी तलासरी पोलीस ठाण्यात भारतीय न्याय संहिता २०२३ तसेच अन्न सुरक्षा मानके कायदा २००६ अंतर्गत विविध कलमांनुसार गुन्हा दाखल करण्यात आला आहे. दोन्ही आरोपींना अटक करण्यात आली असून पुढील तपास तलासरी पोलिस ठाण्याचे पोउपनि अमोल चिंधे करत आहेत. 

सदरची  कारवाई पालघर जिल्ह्याचे पोलीस अधीक्षक यतिश देशमुख, अपर पोलीस अधीक्षक विनायक नरळे आणि डहाणू उपविभागीय पोलीस अधिकारी अंकिता कणसे यांच्या मार्गदर्शनाखाली स्थानिक गुन्हे शाखेचे पोनि प्रदीप पाटील, तलासरी पोलीस ठाण्याचे पोनि अजय गोरड तसेच त्यांच्या पथकातील अधिकाऱ्यांनी केली आहे.